يا هلا والله بكل اللي يقرؤون 🌸💐🌹تخيلي قاعدة في أمان الله بوسط الجمعة وقطت وحدة كلمة كأنها سم 🐍مغلف بضحكة الكل سكت 😶 وبلم فيك ينتظر ردة فعلك! 🤨هنا يجي السؤال الصعب هل أسكت وأمشيها وأكون (متغافلة) وراقية؟ ولا لو سكت بيحسبوني غبية وبداية (استغفال)؟ اليوم بكسر لكم هالحيرة ونعرف متى نمشيها بمزاجنا ومتى نوقفهم عند حدهم🛑
تدرون وش الفرق؟ خلونا نشوف هالمواقف من قلب جمعاتنا🤍
الموقف الأول: نغزات الكلام
وحدة في الجمعة قطت كلمة تلمح لشيء فيكِ، أو في لبسك، أو حتى في عيالك.👦🧒
التغافل الذكي: إنك تسمعينها👂 وتناظرين فيها بابتسامة باردة 😊وتكملين سالفتك مع اللي جنبك وكأنك سمعتِ طنين ذبابة هنا أنتِ تغافلتِ ترفعاً وبينتِ لها إن كلامها أصغر من إنه يحرك فيك شعرة.
الاستغفال (اللي لازم ترفضينه) ⛔️لو هي كل مرة تشوفك فيها تخصص لك "نغزة" وتقلل أدبها قدام الكل وأنتِ ساكتة وتبتسمين 😃هنا الناس بتعود إنك "ملطشة" وممكن يتجرؤون عليكِ هنا الرد لازم يكون هادي وبسؤال وش قصدك بهالكلمة يا فلانة؟ 🤨بسؤال واحد يخليها هي اللي تتورط بالتبرير😰.
الموقف الثاني: "الميانة" اللي تقلب قلة أدب
وحدة من القريبات أو الصديقات تمون بزيادة وتدخل في خصوصياتك (كم شريتي؟ وين رحتي؟ ليش ما حملتي؟).
التغافل الذكي: تمشين السؤال الأول بإجابة عامة "الحمد لله الخير واجد"، وتغيرين السالفة بذكاء. هذا تغافل عشان ما تخربين الجلسة.
الاستغفال: لو صارت تحقق معك في كل صغيرة وكبيرة وتلح في الأسئلة المحرجة.. هنا الوقفة واجبة. قوليها بضحكة: "يا حبي لك يا فلانة، عاد هذي خصوصيات عائلية أخليها في قلبي". كذا أنتِ حطيتي "جدار" بس بأسلوب ذرب.
الموقف الثالث: "الخدمة" اللي تصير حق مكتسب
في جمعة العيد أو المناسبات 🎉🎈🎊دايم فيه وحدة خدومة وتستحي.
التغافل الذكي: إنك تقومين وتساعدين وتتغافلين عن اللي جالسات ما تحركن، احتساباً للأجر وتقدير لصاحبة البيت.
الاستغفال: لو صاروا الناس يأمرونك ويحملونك كل الشغل وأنتِ ضيفة مثلهم، لأنهم تعودوا إنك "ما تقولين لا"🙅🏼♀️ هنا التغافل غلط. لازم توزعون الشغل أو تجلسين وترتاحين مثلك مثلهم.🤭
زبدة الهرجة
يا بنات التغافل مثل الملح 🧂في الأكل إذا زاد خرب الطبخة وصرتِ مستضعفة وإذا نقص صارت حياتك كلها مشاكل وقيل وقال.
تغافلي عن الخطأ العابر عن الكلمة اللي طلعت من لسان وحدة مو قاصدة عن النظرة اللي يمكن فهمتيها غلط. لكن لا تسمحي🙅🏼♀️🚫بالاستغفالفي الطبع المستمرأو قلة الأدب المتعمدة، أو استغلال طيبتك.
خليكِ مثل النخلة🌴 صبورة وظلها واسع وتتغافل عن حرارة الجو، بس عروقها في الأرض ثابتة وما حد يقدر يهزها.
وش رايك؟ هل مريتِ بموقف في جمعة حريم وحسيتِ إنك لو ما تغافلتِ كانت بتصير مشكلة كبيرة؟
تعليقات
إرسال تعليق